АСАЛАРИЧИЛИККА ИННОВАЦИОН ТЕХНОЛОГИЯЛАР ЖОРИЙ ЭТИЛАДИ

Самарқанд Ветеринария медицинаси институтида “Асаларичилик соҳасига   инновацион технологияларни жорий этиш” мавзусига бағишланган ўқув семинар ташкил этилди. Унда институт ректори, профессор Х.Юнусов, илмий ишлар бўйича проректор, профессор А.Даминов ҳамда вилоят Асаларичилик уюшмаси раиси Х.Рашидов, соҳанинг профессор-ўқитувчилари, талабалар ва уюшма аъзолари иштирок этишди. 

Ўқув семинарда Германиянинг “LLC compani” компанияси директори В.Коххнинг асалариларни сунъий уруғлантириш, кўпайтириш ва уни парвариш қилиш борасидаги маърузалари тингланди.

Айтиш жоизки, “LLC compani” компанияси Германиядаги асаларичилик билан шуғулланувчи етакчи компаниялардан бири ҳисобланади.

Бугунги кунда мамлакатимизда қишлоқ хўжалигининг асаларичилик йўналиши тобора ривожланиб бормоқда. Айниқса, асал етиштиришнинг янгича усуллари амалиётга жорий этилмоқда.

Бу жараён Европа давлатларида анча такомиллашган. Хусусан, Германияда асарилар 100 фоиз сунъий урчитилади. Об-ҳаво ва иқлим ўзгаришларидан қатъий назар, бу технология натижасида асал ҳосилдорлиги бир неча баробар ортади.

Ушбу йўналиш бўйича мамлакатимизда кадрлар тайёрлаш тизими ҳам изчил йўлга қўйилган. Ҳозирда Самарқанд Ветеринария медицинаси институтининг “Зооинженерия” факультетида 70 нафарга яқин талаба таҳсил олмоқда.

Ветеринария ва чорвачиликни ривожлантириш
Давлат қўмитаси Ахборот хизмати