Ўзбекистон Республикаси Президентининг Фармонига биноан қуйидаги соҳа ходимлари ҳам Давлатимизнинг юксак мукофотларига муносиб топилди
Ўзбекистон Республикаси Президентининг “Ўзбекистон Республикаси мустақиллигининг ўттиз йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида”ги Фармонига биноан мамлакатимизнинг иқтисодий қудратини мустаҳкамлаш, барча соҳаларда ислоҳотларни муваффақиятли амалга ошириш борасидаги кўп йиллик самарали меҳнати, юртимиз тараққиёти ва халқимиз фаровонлигини таъминлаш, Янги Ўзбекистонни барпо этиш, унинг халқаро майдондаги обрў-эътибори ва нуфузини юксалтиришга қўшган муносиб ҳиссаси, иқтисодиёт тармоқларини замон талаблари асосида модернизация қилиш, илғор инновацион технологияларни жорий этиш, қулай инвестиция муҳитини яратиш, ҳудудлар инфратузилмасини жадал ривожлантиришдаги улкан хизматлари, жамиятда маънавий барқарорликни сақлаш, ёш авлодни она Ватанга муҳаббат, миллий ва умуминсоний қадриятларга ҳурмат руҳида тарбиялаш ишларидаги ибратли фаолияти ҳамда ижтимоий ҳаётдаги фаол иштироки учун кўпчилик юртдошларимиз қатори ветеринария ва чорвачилик соҳалари ходимлари ҳам Давлатимизнинг юксак мукофотларига муносиб топилди.
Унга кўра, Самарқанд ветеринария медицинаси институти ректори Худайназар Юнусов “Ўзбекистон Республикасида хизмат кўрсатган чорвадор” фахрий унвони билан;
Яккабоғ туманидаги “Қорабайир” отчилик мажмуаси директори Джахонгир Садиков, Самарқанд туманидаги “Навобод наслли парранда” фермер хўжалиги бошлиғи Хайдар Ураков, Самарқанд шаҳридаги “Афросиёб парранда” масъулияти чекланган жамияти директори Фаррух Фузайлов “Дўстлик” ордени билан;
“Ўзбекбалиқсаноат” уюшмаси раиси Омонджан Мусаев “Содиқ хизматлари учун” медали билан;
Гулистон туманидаги якка тартибдаги тадбиркор, асаларичи Бегзод Абдираимов “Жасорат” медали билан;
Фарғона туманидаги якка тартибдаги тадбиркор, асаларичи Олимжон Аҳмедов, Пешку туманидаги “Хастанапур наслли чорвадор” масъулияти чекланган жамияти раҳбари Мансур Маҳмудов, Қўштепа туманидаги “Шукрдавлат” хусусий корхонаси раҳбари Шукурулло Сайдуллаевлар “Шуҳрат” медали билан тқдирландилар.
Мазкур мукофот эгаларини Давлат ветеринария қўмитаси раҳбарияти ва ходимлари номидан муборакбод этиб қоламиз!
