Сигир аллегрик тошмага чалинганлиги маълум бўлди

Ижтимоий тармоқларда Андижон вилоятида қорамолларда нодуляр дерматитга ўхшаш номаълум касаллик тарқалаётгани хусусида хабарлар тарқалган эди.
Ҳолат Ветеринария ва чорвачиликни ривожлантириш қўмитаси Ишчи гуруҳи ва ички ишлар идоралари мутахассислари билан ҳамкорликда ўрганилди. Воқеа жойи аниқланиб, ҳолат назоратга олинди.
Яъни, ижтимоий тармоқларда расм ва видеолари тарқалган қорамол Избоскан тумани Анорзор МФЙ да яшовчи Хайрулла Эшонжоновга тегишли эканлиги маълум бўлди.
Қорамол клиник кўрикдан ўтказилиб, олинган қон ва бошқа намуналар лабаратория текширувларидан ўтказилганда ушбу сигир нодуляр дерматит ёки номаълум касаллик билан эмас, аллергик тошмага чалинганлиги аниқланди.
Маълум бўлишича, сигирнинг терисига бундан 24 кун муқаддам, яъни 15 июн куни аллергик тошма тошган. Бу ҳақда эгаси маҳаллий ветеринария мутахассисига мурожаат қилган.
Мутахассислар клиник кўрикдан ўтказиб, даволаш ишлари олиб борган. Қорамолнинг иштаҳаси ўрнига келган. Умумий ҳолати яхшиланган ва аллергик тошмалар йўқолган. 18 июн куни ушбу сигир соғлом бузоқ туққан. Ҳозирда сигир ва боласининг умумий ҳолати яхши.
Суриштирув давомида унга озуқа орқали аллергик тошма тошганлигини эгаси ҳам тасдиқлади. Хонадондаги қолган 8 бош қорамолда бундай ҳолат кузатилмаган.

Ветеринария ва чорвачиликни
ривожлантириш қўмитаси
Ахборот хизмати